Hnehna nun chu chhungrilah a in tan thin
By Denis Lalfela
Pathian ruahmanna (project) ropui takah hmun pawimawh tak i luah tih i ngaihtuah ngai em? A fapa pawh ui lova petu che, Pathian chuan a khawngaihnain a umzui reng che asin. April thla tirah Lalpa thawhlehna kut (Easter) kan lawm leh dawn a. Easter atana thlarauva inbuatsaihna urhsun chu Kohhran thenkhatin an nei a. Hmangaih Pathian, thlei bik nei lo betute chu hmangaihna tihthar a, inlamleta Chanchin Tha ring tura sawm thar leh kan ni. Mihring dan, tlanna leh hahchawlhna thlen thei lo chu paih thla a, Krista khawngaihna dal lal ber tura sawm kan nihna hi a va ropui em! Tholeh Krista kan hmuah lai hian, kan inbuatsaih ve theih dan i ngaihtuah ho dawn teh ang.
1.Tawngtaina: Pathian nena kan inkar chingfel turin nasa lehzuala tawngtai tura sawm kan ni. Nitina kraws kan dawn te pawh hi kan tana Krista tuarna ngaihtuahna piahlamah, thildang zawng aia hmangaih phu Pathian thlan thar leh kan duhna puanchhuahna a lo ni daih mai. Lal Isua meuh pawh ni 40 leh zan 40 thlalerah a tawngtai a nih kha! A Pa nena inlaichinna tha tak a neih tlat avangin hmelmapa Setana pawh a hlau lo. Zing takah thovin tlangahte a tawngtai a. Pathian biak nana hun kan inpek phal tam ang zelin kan thinlungah Pathian a rawn lal mai dawn a ni. Mimal leh chhungkaw tawngtaina kan neih loh chuan Pathianni a inkhawm ngawt hian kar tluanin min chawm hlei thei lova. Kan inrin hmain kan tlu leh duai thin a ni lawm ni? Tawngtaina chuan harsatna min lak kian sak vek lo mahse a pawm dan leh thlir dan min zirtir zawk thin a ni. Tawngtaina in chhelna leh lawman sawi hleih theih loh min pek hi khawvel sum leh pai hian a lei thei ngai hauh loving.
2. Thilpek: Kan vengte hmangaih duh theuh mah ila chaklohna hrang hrang avangin kan intina tawn a, inbe hlei thei lovin thenawm khawveng kan awm fo awm e. Heng kan unaute nena inremleh kan duhna hi thilpek hmangin kan hlen thei a. Kan chak em em te ei lovin kan insum a. Thawmhnaw leh pawisa te pawh chanhaite hnenah phal takin kan sem thin. A lova kan awm theih, midangte tana malsawmna nasa tak ni si tih nachang hriat hi Lal Isua duhzawng a ni. Sum leh pai chauh hi midangte kan tanpuina leh thawidam theihna a ni lova. Khawvel changkang zelah ngaithlatu neilote pawh an tam tial tial a. Chutianga harsatna tawkte ngaihthlak leh chhawmdawl chu a Pathian thu a, Lent hun pawhin min sawmna urhsun a ni. Vengte hmangaih lo hian Pathian kan hmangaih thei tlat si lo.
3. Chawnghei: Mahni mahmawh, duhzawng tak mai tlachhama insiam hi thil har tak a ni. Chaw ei peih loh avanga chaw ei loh chuan hlawkna leh awmzia a nei hran lo. Krista thlan thar leh hmangaih zual zel duh vanga chawnghei erawh Pathian ngaihin a ropui a, a hlawkna ataka hmuh zel theih a ni. Kan sual apiangin mahni kan intina a, Siamtu min kohna kan hawisan thin. Taksa hrehawmna chuan Pathian min auhtir a, mahni inthununna min pe a, tawngtai chakna thinlung min pe bawk. Fate tana tawngtaite, mamawh bik leh damlote tana chaw nghei hi a hlawkin rah tha a chhuah ngei ngei thin. Kan nitin nu hi Krista khawngaihna kan temna leh Krista kan thlan tharna hun tha lo ni zel mawlh rawh se.
http://youthim.com/index2.php?article&content_body_id=267
(He article ziaktu hi Rome a awm thin kha a ni a. October 2010 atang khan Sacred Heart Theological College, Mawlai, Shillong ah professor leh staff in a awm a. Contact no: 9862753130)
