MOTHER TERESA (1910-1997)

Tuivar Khua

by. Lalhmingliana, Malaysia

2009 Mother's day khan “Nute pawimawhna” thupui hmangin MCF biak inah thu ka sawi tawh a. 2010 Mother's day a lo hnaih leh takah chuan ka rilruah Mother Teresa chanchin hi kan hriat tawh pawh nise tarlan remtihna a lian tlat mai a, mi article denchhenin ka rawn tarlang ve a ni e. A pian leh murna chanchin tlem leh Nobel Peace prize a lak tuma a thusawi tlem ka rawn ziak ve ang e. Khawvel hmeichhe entawntlak ka pi thu sawi hi lo chhiar ve teh khai...


A chanchin tawi
- Yugoslavia ram Scothyi khuaah August 27, 1910 khan a piang.
- Alviania hnam thlah a ni.
- Primary sikul a kal lai atangin ' Mother Tere ' ah a lut.
- Kum 18 a nihin Ireland, Dublin-ah hmeichhe puithiam sikulah a lut a, hun rei lo teah India ram Dhochilin-ah kalin hmeichhe puithiam a ni ta a ni.
- Mitin tana thil tha tih hi a hna pui ber a ni.
- A hun zawng zawng mite tana thiltha tih nan a hman avangin 1979 ah Nobel Peace Prize hlan a ni.
- September 5, 1997 ah a thi.

Nobel Peace Prize a dawn nia a thusawi thenkhat

He Nobel Peace Prize avanga he hmuna Pathian fak tura lo kal zawng zawngte hian St. Francis-a tawngtai thute chhamrual ila, a inhmeh hlein ka ring. Chu tawngtai thu chuan min thawng em em a, Pathian fakhona kan neih zawh apiangin kan chhamrual thin reng a ni. Mimal tinten chu tawngtai thu chu kan mamawh vek avang leh kan hriat reng ka duh vang pawh a ni. Hun kalta kum 500 vela St. Francis an he tawngtai thu a lo siam hi ka ngaihtuahin tuna kan tawh mek harsatna ang hi an lo tawk ve tawh em ni tih hi hriat chakna ka neih phah bawk a.
In zinga thenkhatte chuan chu tawngtai thu chu in by-heart tawh ang a. Chuvangin kan tawngtai ho tur a ni. ' Lalpa ka hmangaih che' tih hi a tawk mai lova," kan thenawmte pawh ka hmangaih" tih tur a ni. " Pathian ka hmangaih ti a, thenawmte hmangaih si lo chuan dawt a sawi a ni" tiin St. John chuan a sawi a ni. Kan hmuh, kan deh theih leh kan awmpui reng thenrualte ( kan vengte ) hmangaih si lovin kan hmuh theih loh leh deh theih loh Pathian chu engtinnge kan hmangaih theih ang???
In pakhata ka len laia thil pakhat ka theihnghilh theih loh a awm a. Fanu fapa ten an nu leh pa tar tawh takte chu an theihnghilh hlawm a ni tih hi a ni. Chu inah chuan pitar putarte chuan eiin tha, awmna nuam etc... zawng zawng an neikim vek a. Mahse chung upa tawh takte chuan kawngka pui ngawt mai chu an thlir hlawm a, hlim hmelpu reng an awm lo. Enkawltu pakhat hnenah chuan " Heng upa ho hi nuam takin an awm si a, hlim hmel pu reng ka hmu lo, engnge a chhan?" tiin ka zawt ta chawt mai a ni. Enkawltu chuan ti hian min chhang a. " An fanu emaw an fapate emaw an hnena rawn len beisei takin an thlir a nih kha, fate theihnghilh an nih hlawm avangin an rilru a na a nih kha" tiin.
Hmangaihtute theihnghilh hi rilru lam chian tawk loh vang a ni a. Kan chhung zingah hrehawm taka harsatna, dam lohna mal tawrh ngawih ngawih kan awm thin ngei ang. Chutih lai chuan an kiangah kan awm ngai em? Kan tanghma chauh nge kan thlir le? Chungte chu mahni leh mahni inzawh thin tur a ni. Kan chhinchhiah reng tur chu 'Hmangaihna leh hmalam hun chu mahni inchhung atang tan a ni' tih hi.
Khaw chhak thalai ten ruihhlo an ngai em em hlawm a ni tih ka hmuhin mak ka ti a, engvang nge tih pawh ka chhui nasa hle bawk. Asia ram aiin bungrua leh hmanrua nei tha zawk siin engvangin nge ruihtheih thil an tih hlawm ni? A chhan chu, an inchhungah lo lawmluttu tumah an awm loh vang a ni. Kan fate hian kan chungah engkim beisei takin an in tulut a ni. Hriselna, taksa chakna, humhimna leh engkim maiah hian nu leh pate hi beiseina leh rinnain min thlir reng a. Mahse nu leh pate hian hna kan ngah thin lutuk avangin fate tan hun kan pe thei thin lo. Chu chuan fanaute kawnglai a thlentir zo ta a, ruihtheih thil leh thildang an pan phah thin a lo ni.
Pathianin min hmangaih a ni tih kan hriat a, chu min hmangaih ang chiah a midang kan hmangaih ve thei anih chuan Norway ram hi hmangaihnaa khat a lo ni dawn a ni. Nangnipawh hi khawvel inremna meichher keng in nih chuan Nobel Peace Prize hi Norway mipuite thilthlawn pek a ni reng a ni. In zavaiin Lalpan malsawm cheu rawh se tiin a thusawi a ti tawp a ni.